Në një përballje dramatike në Allianz Arena, Bayern Munich mposhti me rezultatin 4-3 Real Madrid, duke siguruar kualifikimin në gjysmëfinalet e UEFA Champions League. Pas fitores 2-1 në ndeshjen e parë në Madrid, bavarezët vulosën kalimin e turit me një përmbysje spektakolare në shtëpi.

Në gjysmëfinale, skuadra e drejtuar nga Vincent Kompany do të përballet me kampionët në fuqi, Paris Saint-Germain, që eliminuan një ditë më parë Liverpool.

Ndeshja nisi në mënyrë tronditëse për vendasit, pasi Arda Güler kaloi në avantazh madrilenët që në sekondat e para, duke përfituar nga një gabim i Manuel Neuer. Reagimi i Bayern ishte i menjëhershëm dhe Aleksandar Pavlović barazoi në minutën e 7-të pas një goditjeje këndi të ekzekutuar nga Joshua Kimmich.

Megjithatë, Real Madrid riktheu epërsinë në minutën e 29-të, sërish me Güler, i cili realizoi një gol të bukur nga goditja e dënimit. Bavarezët nuk u dorëzuan dhe Harry Kane barazoi shifrat në 2-2 në minutën e 38-të, duke vijuar sezonin e tij të jashtëzakonshëm në aspektin realizues.

Pjesa e parë mbeti e hapur dhe spektakolare: Kylian Mbappé riktheu avantazhin për madrilenët (3-2), ndërsa Vinícius Júnior goditi edhe traversën në një tjetër rast të rrezikshëm.

Në pjesën e dytë, ritmi mbeti i lartë. Manuel Neuer reagoi me një pritje vendimtare ndaj Mbappé, ndërsa Andriy Lunin u detyrua të ndërhynte disa herë për të mbajtur në lojë Realin.

Momenti kyç erdhi në minutën e 86-të, kur Eduardo Camavinga u ndëshkua me karton të dytë të verdhë, duke lënë spanjollët me një lojtar më pak. Bayern përfitoi menjëherë: Luis Díaz barazoi në minutën e 89-të, ndërsa në shtesë Michael Olise realizoi golin e fitores 4-3, duke shpërthyer festën në Mynih.

Në përfundim, një sfidë e mbushur me gola, emocione dhe polemika, ku Bayern Munich siguroi një kualifikim dramatik, ndërsa Real Madrid u eliminua mes protestave, me Güler që u ndëshkua pas vërshëllimës përfundimtare.