Është shtyrë seanca gjyqësore në Gjykatën e Posaçme Kundër Korrupsionit dhe Krimit të Organizuar (GJKKO) ndaj kryebashkiakut të Tiranës, Erion Veliaj, si dhe të pandehurve të tjerë në këtë proces. Seanca e radhës është caktuar të zhvillohet më 27 prill, në orën 12:00.

Veliaj nuk ka qenë i pranishëm në sallën e gjyqit dhe, sipas raportimeve, nuk ka dhënë asnjë shpjegim zyrtar lidhur me arsyet e mungesës së tij.

Po ashtu, është bërë me dije se Drejtoria e Përgjithshme e Burgjeve nuk ka zbatuar urdhrin e gjykatës për shoqërimin e të pandehurit dhe nuk ka vënë në dispozicion dokumentacionin përkatës.

Gjatë seancës, prokurori Altin Dumani ka kërkuar që të merren masa për situatën e krijuar, duke theksuar se mosnjoftimi i të pandehurit për seancën përbën shkak për moszhvillimin e saj. Ai ka kërkuar që, në rast shtyrjeje, seanca e radhës të caktohet sa më shpejt.

Gjithashtu, është urdhëruar Drejtoria e Burgjeve që të informojë gjykatën mbi arsyet e mosnjoftimit të Veliajt për datën dhe orën e seancës së sotme.

Ndërkohë, avokati i tij ka kërkuar respektimin e të drejtave procedurale, duke theksuar se i pandehuri duhet të njoftohet rregullisht dhe të ketë mundësi të shprehë vullnetin për pjesëmarrje në proces.