Avokatja Eranda Gjonaj ka ngritur shqetësimin për një fenomen në rritje që, sipas saj, po ndikon ndjeshëm në statistikat e divorceve në vend.

Gjonaj u shpreh se rritja e numrit të ndarjeve nuk pasqyron domosdoshmërisht një krizë të re të familjes, por lidhet edhe me martesat fiktive për arsye dokumentesh, të cilat po bëhen gjithnjë e më të zakonshme mes të rinjve.

Sipas saj, shoqëria shqiptare po kalon nga një model kolektiv drejt një qasjeje më individualiste, fenomen që reflektohet veçanërisht tek brezi i ri. Ajo theksoi se të rinjtë po martohen më pak, ndërsa martesat në moshë të hershme shpesh rezultojnë jetëshkurtra.

“Statistikat mund të jenë disi artificiale”, u shpreh Gjonaj, duke shtuar se një pjesë e ndarjeve lidhen me martesa të lidhura për qëllime praktike, kryesisht për dokumentacion, të cilat më pas përfundojnë shpejt.

Ajo theksoi se në shumë raste, çiftet nuk ndjekin procedurën e divorcit, por kërkojnë shpalljen e pavlefshmërisë së martesës për t’u rikthyer në statusin e mëparshëm civil.

Sipas Gjonajt, ky fenomen është në rritje dhe mund të jetë tashmë në kulmin e tij, duke ndikuar drejtpërdrejt në perceptimin publik mbi stabilitetin e martesave në vend. Burimi: Oranews