Tiranë, 14 prill 2026 – Pas zjarrit të rënë në një kompleks banimi në kryeqytet, Inspektorati i Përgjithshëm ka bërë të ditur se po ndjek nga afër zhvillimet e situatës dhe ka nisur veprimet për zbardhjen e plotë të ngjarjes.

Me urdhër të Inspektorit të Përgjithshëm, Dashnor Sula, është ngritur një grup pune i posaçëm, i cili do të kryejë verifikime të detajuara mbi rrethanat e zjarrit.

Sipas njoftimit zyrtar, hetimet do të fokusohen në kontrollin e aktiviteteve ekonomike që ushtroheshin në ambientet e kompleksit, për të verifikuar nëse ato kanë qenë në përputhje me kushtet teknike dhe kërkesat ligjore në fuqi.

Gjithashtu, grupi i punës do të shqyrtojë funksionimin dhe mirëmbajtjen e sistemeve të sigurisë, përfshirë alarmet kundër zjarrit, pajisjet për shuarjen e flakëve, sinjalistikën orientuese dhe daljet emergjente.

Inspektorati i Përgjithshëm thekson se do të bashkëpunojë ngushtë me institucionet përgjegjëse dhe do të ndërmarrë të gjitha masat e parashikuara nga legjislacioni në fuqi, në funksion të zbardhjes së plotë të shkaqeve dhe përgjegjësive për këtë ngjarje.