Sektori i transportit publik në Shqipëri po përballet me vështirësi të theksuara financiare, ndërsa operatorët paralajmërojnë masa që pritet të ndikojnë drejtpërdrejt te qytetarët.

Shoqata Kombëtare e Transportit Qytetas dhe Shoqata e Transportit Urban dhe Interurban bëjnë me dije se, pavarësisht kërkesave të vazhdueshme dhe një takimi me institucionet më 1 prill, nuk është marrë asnjë masë konkrete në mbështetje të sektorit.

Sipas tyre, mungon një skemë kompensimi për rritjen e çmimit të karburantit, nuk ka një plan për uljen e kostove dhe nuk është dhënë asnjë afat për ndërhyrje. Gjithashtu, nuk ka nisur rishikimi i taksave që ndikojnë drejtpërdrejt në shpenzimet e operatorëve, përfshirë akcizën, taksën e qarkullimit dhe TVSH-në.

Operatorët theksojnë se kjo situatë ka rënduar ndjeshëm gjendjen ekonomike të kompanive, duke e bërë të vështirë vijimin normal të aktivitetit.

Për pasojë, duke nisur nga nesër, pritet reduktimi me 40% i mjeteve në qarkullim, çka do të sjellë më pak autobusë në linja dhe vështirësi të shtuara për qytetarët në lëvizje.

Shoqatat u bëjnë thirrje qytetarëve për mirëkuptim dhe planifikim të udhëtimeve, ndërsa kërkojnë ndërhyrje të menjëhershme nga institucionet për të shmangur përkeqësimin e mëtejshëm të situatës.