TIRANË – Gjykata e Posaçme kundër Korrupsionit dhe Krimit të Organizuar (GJKKO) ka dënuar ish-kryebashkiakun e Finiq, Leonidha Hristo, me 4 vite burg, dënim i cili për shkak të gjykimit të shkurtuar është ulur përfundimisht në 2 vite heqje lirie.

Sipas vendimit të gjykatës, Hristo është shpallur fajtor për veprën penale “shpërdorim detyre”, lidhur me abuzime në procedurat e prokurimit publik, me një dëm të dyshuar që arrin rreth 77 milionë lekë.

Hetimet e SPAK kanë zbuluar se gjatë periudhës 2017–2019 janë kryer procedura të dyshuara fiktive tenderash, me qëllim favorizimin e subjekteve të paracaktuara.

Sipas dosjes hetimore, ish-zyrtari dhe bashkëpunëtorët e tij kanë ndikuar në mënyrë të paligjshme në procesin e prokurimeve publike.

Leonidha Hristo ka qenë gjithashtu kandidat në zgjedhjet lokale të vitit 2023 nën koalicionin “Bashkë Fitojmë”.

Ndërkohë, çështjet ndaj bashkëpunëtorëve të tjerë vijojnë të shqyrtohen në Gjykatën e Sarandës, pas ndarjes së kompetencave nga GJKKO.