Java e 31 e Kategoria Superiore u mbyll me një surprizë të madhe, ku KF Elbasani mposhti bindshëm FK Partizani me rezultatin 3-0, pavarësisht se luajti me një futbollist më pak për rreth 70 minuta.

Pjesa e parë ishte e balancuar, me të dyja skuadrat që kërkuan golin që në minutat e para. Rasti më i diskutueshëm erdhi në minutën e 20-të, kur Elbasani mbeti me 10 lojtarë pas daljes me karton të kuq të Mustës, vendim i marrë pas rishikimit me sistemin VAR. Loja u ndërpre për disa minuta edhe për shkak të hedhjes së sendeve në fushë nga tifozët, por u rikthye në normalitet pa pasoja të mëtejshme. Fraksioni i parë u mbyll në barazim pa gola.

Në pjesën e dytë, Elbasani fitoi një penallti pas një prekjeje të topit me dorë në zonën e Partizanit. Fillimisht, portieri i të kuqve ndali gjuajtjen e Ze Gomes, por 11-metërshi u përsërit për shkak të shkeljes së rregullit nga gardiani. Në tentativën e dytë, Ze Gomes nuk gaboi, duke kaluar verdheblutë në avantazh.

Edhe pse në inferioritet numerik, Elbasani u shfaq më kërkues dhe më i organizuar, ndërsa Partizani hasi vështirësi për të reaguar. Rasti më i mirë për barazim për të kuqtë u ndal nga traversa në minutat e fundit.

Sipas rregullit të pashkruar të futbollit, mosshfrytëzimi i rasteve u ndëshkua menjëherë: Elbasani realizoi golin e dytë me Tsague, ndërsa në kohën shtesë vulosi fitoren me golin e tretë të shënuar nga Kasë.

Me këtë sukses, KF Elbasani ngjitet në vendin e dytë me 56 pikë, ndërsa FK Partizani mbetet me 44 pikë, duke dalë përkohësisht jashtë zonës “play-off”, në një garë të fortë me rivalët direkt për fazën përfundimtare të kampionatit.