KRUJË – Janë zbardhur detaje nga dëshmia e autorit të dyshuar për vrasjen e 48-vjeçarit Artur Cangu në Nikël, ngjarje që tronditi zonën e Fushë-Krujës.

Autori i dyshuar, Eduart Afmataj, ka deklaruar përpara grupit hetimor se fillimisht mes tij dhe viktimës ka pasur një konflikt verbal, i cili më pas ka eskaluar në dhunë fizike.

Sipas dëshmisë së tij, viktima e ka goditur me një kosë të vogël në krah, ndërsa ai është përgjigjur duke përdorur një armë gjahu, me të cilën ka qëlluar 48-vjeçarin, duke i shkaktuar vdekjen.

Menjëherë pas ngjarjes, autori ka njoftuar Policinë dhe më pas është larguar nga vendi i ngjarjes. Ai u arrestua brenda 24 orëve në zonën e Bruz Mal, ku ishte fshehur.

Sipas burimeve policore, gjatë arrestimit ai nuk ka bërë rezistencë, ndërsa arma e krimit ende nuk është gjetur.