Itali – Një ngjarje tragjike ka tronditur Italinë, ku një 12-vjeçar nga San Benedetto del Tronto ka humbur jetën pasi mbeti i bllokuar në një xhakuzi për disa minuta.

Ngjarja ndodhi në Pennabilli, pranë Riminit, ku i mituri ndodhej me pushime së bashku me familjen për festën e Pashkëve. Sipas raportimeve të mediave italiane, këmba e tij mbeti e bllokuar në grykën thithëse të instalimit, duke e mbajtur të zhytur nën ujë.

Fëmija u nxor nga uji në gjendje të pavetëdijshme dhe u transportua me urgjencë në spitalin “Infermi” të Riminit. Pavarësisht përpjekjeve të mjekëve dhe qëndrimit prej katër ditësh në terapi intensive, ai nuk arriti të mbijetojë.

Aksidenti dhe hetimet

Ngjarja e rëndë ndodhi mëngjesin e Pashkëve, ndërsa djali ndodhej në vaskën me ujë të ngrohtë të një hoteli, në shoqërinë e prindërve dhe të afërmve të tij. Sipas të dhënave paraprake, forca e thithjes së sistemit e pengoi atë të çlirohej, pavarësisht përpjekjeve të menjëhershme të familjarëve për ta ndihmuar.

Autoritetet italiane kanë nisur hetimet për të zbardhur plotësisht rrethanat e ngjarjes. Dyshimet kryesore lidhen me mundësinë e neglizhencës nga ana e strukturës hoteliere, veçanërisht për mirëmbajtjen dhe funksionimin e sistemeve të sigurisë.

Objekti është sekuestruar, ndërsa ekspertët po analizojnë pajisjet për të verifikuar nëse ka pasur defekte teknike apo mungesë të mekanizmave mbrojtës. Hetimet vijojnë.