Një incident i rëndë është regjistruar në zonën Gardolo në Itali, ku tre vëllezër shqiptarë kanë dhunuar pronarin e lokalit “Milena” pas një konflikti për zhurmën e muzikës.

Sipas mediave italiane, ngjarja nisi kur pronari konstatoi mungesën e energjisë elektrike dhe doli për të kontrolluar sahatin e pallatit. Në momentin që dera iu hap, ai u sulmua menjëherë nga një prej vëllezërve, i cili e akuzoi për muzikë të lartë.

Pavarësisht sqarimeve se lokali mbyllej në orën 20:00, situata u përshkallëzua dhe pronari u godit me kokë, duke përfunduar në tokë. Ai arriti të strehohej brenda lokalit për të kërkuar ndihmë, ndërsa në vendngjarje mbërritën forcat e rendit.

Tensioni vijoi kur dy vëllezërit e tjerë iu bashkuan konfliktit, duke shkatërruar ambientet e lokalit. Tavolina dhe karrige u hodhën drejt xhamit, duke e thyer atë dhe duke shkaktuar dëme të konsiderueshme materiale.

Gjatë ndërhyrjes së policisë, përplasja u intensifikua, duke lënë një karabinier të plagosur dhe duke dëmtuar pajisjen “taser” të një tjetri.

Tre vëllezërit, rezidentë në Trento, janë arrestuar dhe po përballen me drejtësinë, ndërsa pronari i lokalit ndodhet në spital me dëmtime të shumta dhe traumë në kokë. Në seancën gjyqësore të 8 prillit, avokati i tij kërkoi një dëmshpërblim prej 70 mijë eurosh, ndërsa çështja është shtyrë për shqyrtim të mëtejshëm.