LOS ANGELES – Jasveen Sangha, e njohur si “Mbretëresha e Ketaminës”, është dënuar me 15 vjet burg për shpërndarjen e ketaminës që çoi në vdekjen e aktorit të serialit të njohur amerikan, Friends, Matthew Perry.

42-vjeçarja pranoi fajin për pesë akuza, përfshirë shpërndarjen e ketaminës që rezultoi në vdekje ose lëndim trupor. Prokurorët përshkruan shtëpinë e saj si një “emporium shitjeje droge” që i siguronte një stil jetese luksoz. Autoritetet federale gjetën dhjetëra doza ketamine dhe mijëra tableta të tjera droge, përfshirë metamfetaminë, kokainë dhe Xanax, të cilat Sangha i shpërndante që nga viti 2019 nga North Hollywood.

Matthew Perry, i njohur për rolin e Chandler Bing, luftoi për dekada me varësinë nga substancat dhe u gjet i vdekur në tetor 2023 në vaskën e ujit të ngrohtë të shtëpisë së tij. Hetuesit konfirmuan se shkaku i vdekjes ishte përdorimi i ketaminës, një anestezik disociativ me efekte halucinogjene, i cili duhet përdorur vetëm nën mbikëqyrje mjekësore.

Para shpalljes së dënimit, njerka e Perry-t, Debbie Perry, i kërkoi gjykatës të japë maksimumin e dënimit: “Ti shkakrove këtë… Ti, që ke talent për biznes, zgjodhe rrugën që dëmton njerëzit,” tha ajo.

Sangha është një nga pesë personat që autoritetet federale thonë se i kanë furnizuar Perry-n me ketaminë. Të tjerët, përfshirë mjekët Dr. Salvador Plasencia dhe Dr. Mark Chavez, si dhe asistenti i aktorit, Kenneth Iwamasa, kanë pranuar fajin ose janë dënuar me masa të ndryshme.

Rasti ka tërhequr vëmendje të madhe, duke nxjerrë në pah rreziqet e shpërndarjes së drogës dhe ndikimin tragjik të varësisë nga substancat tek individë të famshëm dhe familjet e tyre.