Gjykata e Tiranë dënon me 6 vite burgim Altin Çokun për rastin e Sibela Abedinit

Gjykata e Tiranës ka dënuar me 6 vite burgim shtetasin Altin Çoku, i akuzuar për shtyrjen drejt vetëvrasjes së një 27-vjeçareje, nënë e një fëmije të mitur.

Vendimi është marrë pas shqyrtimit të dosjes gjyqësore, ku trupa gjykuese e shpalli fajtor për veprën penale “shkaktimi i vetëvrasjes”, ndërsa pushoi akuzën për “përndjekje”. Më herët, prokurori i çështjes, Drini Pali, kishte kërkuar dënimin me 9 vite burgim.

Sipas hetimeve, i pandehuri kishte publikuar në rrjetin social TikTok materiale intime të viktimës, Sibela Abedini, duke i shkaktuar asaj gjendje të rënduar psikologjike, ankth dhe depresion.

Ngjarja e rëndë ndodhi në shkurt të vitit 2024, në zonën e Bathore, ku viktima u vetëhodh nga kati i katërt i një ndërtese. Ajo u transportua me urgjencë në spital, por nuk arriti t’i mbijetojë plagëve.

Sipas materialeve hetimore, viktima kishte pasur një marrëdhënie intime me të pandehurin, i cili kishte realizuar dhe më pas publikuar foto private pa pëlqimin e saj. Ky veprim, sipas organit të akuzës, ndikoi drejtpërdrejt në përkeqësimin e gjendjes së saj emocionale, duke e çuar drejt aktit ekstrem.

Pas ngjarjes, policia arrestoi Altin Çokun, ndërsa procesi gjyqësor përfundoi me dënimin e tij me 6 vite burgim.

Rasti ka rikthyer në vëmendje rreziqet që lidhen me shpërndarjen e materialeve intime në rrjetet sociale dhe pasojat e rënda që mund të sjellin për viktimat.