Itali – Dy shtetas shqiptarë janë përballur me drejtësinë italiane pas arrestimit për posedim të lëndëve narkotike me qëllim trafikimi në rajonin e Valle d’Aosta.

Bëhet fjalë për Olgert Prenga, 29 vjeç, me precedent penal, dhe Klisman Ndoj, 25 vjeç, pa precedent, të cilët u ndaluan nga policia në zonën e Aymavilles.

Pas shqyrtimit të çështjes, gjykata vendosi masa sigurie alternative ndaj tyre. Konkretisht, Prenga është lënë në arrest shtëpiak brenda rajonit, ndërsa Ndoj është ndaluar të qëndrojë në të gjitha komunat e Valle d’Aosta-s.

Sipas hetimeve, dy të rinjtë kishin hyrë në Itali me viza turistike dhe kishin marrë me qira një apartament në një shtëpi pushimi. Sjellja e tyre kishte ngjallur dyshime te banorët vendas, të cilët kishin raportuar për lëvizje të pazakonta dhe frekuentim nga persona të panjohur.

Pas sinjalizimeve, policia kishte nisur vëzhgimin e tyre për disa ditë. Gjatë kontrollit në një banesë ferme pranë zonës, ku ata dyshohej se lëviznin shpesh, u zbulua një sasi kokaine në një kavanoz. Ndërkohë, në apartamentin e marrë me qira u sekuestruan rreth 5 mijë euro cash, një peshore precize dhe rreth 15 gramë lëndë narkotike, përfshirë hashash dhe kokainë.

Në seancën për vlerësimin e masës së sigurisë, Ndoj zgjodhi të mos japë deklarime, ndërsa Prenga deklaroi se lëndën narkotike e kishte blerë për përdorim personal. Megjithatë, gjykata vlerësoi se ekziston rrezik për përsëritje të veprës penale, por e konsideroi të mjaftueshme vendosjen e masave alternative, pavarësisht kërkesës së prokurorisë për burgim në institucionin penitenciar të Burgu i Brissogne.