Shoqata “Blegtorët Prodhues të Qumështit” organizoi sot një protestë përpara Ministrisë së Bujqësisë, duke shprehur pakënaqësinë ndaj skemës kombëtare të mbështetjes për vitin 2026.

Fermerët mbajtën pankarta me mesazhe si: “Stop importit të qumështit”, “Formalizoni tregun e bulmetit” dhe “Bojkotoni firmat serbe”. Ata kërkojnë subvencionim të karburantit dhe rritje të mbështetjes financiare për sektorin e blegtorisë.

“Skema nuk na mbështet, kostot janë të larta dhe nuk korrespondoi me atë që u diskutua me ne. Kërkojmë subvencionim të naftës dhe bllokimin e importit që na konkuron,” deklaruan fermerët.

Ata shprehen se subvencionet në Shqipëri janë 7-8 herë më të ulëta krahasuar me rajonin, duke e vështirësuar konkurrencën. Përveç kostove të karburantit dhe ushqimit të bagëtive, fermerët theksuan edhe informalitetin dhe TVSH-në e pabarabartë si sfida shtesë.

Fermerët kërkuan gjithashtu ngritjen e një laboratori për sigurinë e produkteve dhe formimin e një bordi për produktet e shportës, për të mundësuar konkurrencën me fermerët evropianë.

Aktualisht ata janë në pritje të një takimi me ministrin e Bujqësisë dhe ministren e Financave për të diskutuar kërkesat e tyre.