Detaje të reja janë zbuluar lidhur me dy shtetas të huaj, të cilët u gjetën pa jetë në një zonë malore në Korçë.

Ngjarja është regjistruar rreth orës 17:00 të datës 4 prill, në malin e Kamenicë, në vendin e njohur si “Qyngji”, ku autoritetet kanë konstatuar trupat e pajetë të dy personave, që dyshohet se janë emigrantë të paligjshëm me origjinë nga vendet e Afrikës.

Sipas të dhënave paraprake, viktimat janë të moshës rreth 20–22 vjeç. Nga këqyrja fillestare e trupave nuk janë evidentuar shenja dhune, çka lë të kuptohet se vdekja mund të ketë ardhur si pasojë e kushteve të vështira natyrore apo faktorëve të tjerë ende të paqartë.

Autoritetet bëjnë të ditur se pritet kryerja e ekspertizës mjekoligjore, e cila do të përcaktojë shkakun e saktë të humbjes së jetës.

Ndërkohë, grupi hetimor, nën drejtimin e Prokurorisë, po vijon punën për zbardhjen e plotë të rrethanave të kësaj ngjarjeje.