ELBASAN – Specialistët për Hetimin e Narkotikëve në Drejtorinë Vendore të Policisë Elbasan, në bashkëpunim me shërbimet e Forcës së Posaçme “Shqiponja” dhe nën drejtimin e Prokurorisë Elbasan, finalizuan me sukses operacionin policor të koduar “Bulevardi”, duke goditur aktivitetet kriminale në fushën e shpërndarjes së narkotikëve.

Gjatë operacionit u arrestuan në flagrancë dy shtetas:

F. P., 37 vjeç, banues në Elbasan, i dyshuar për veprat penale “Prodhimi dhe shitja e narkotikëve” dhe “Prodhimi, mbajtja, blerja apo shitja pa leje e armëve të ftohta”; L. Xh., 34 vjeç, banues në Elbasan, i dyshuar për veprën penale “Moskallëzimi i krimit” dhe me precedent penal në fushën e narkotikëve.

Ata u kapën në bulevardin “Qemal Stafa”, duke udhëtuar me automjet tip Mercedes Benz, ku F. P. ishte drejtues dhe L. Xh. pasagjer.

Gjatë kontrollit të automjetit, policia sekuestruar:

Lëndë narkotike të dyshuara kokainë dhe kanabis, të ndara në doza gati për shitje; Një shkop metalik me hapje; Tre aparate celularë; Një shumë parash në euro dhe lekë, të dyshuara të përfituara nga aktiviteti kriminal; Automjeti i përdorur për shpërndarjen e drogës.

Materialet procedurale janë dorëzuar pranë Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme hetimore.