Presidentja e Republikës së Kosovës, Vjosa Osmani, do t’i dorëzojë detyrën Kryetares së Kuvendit, Albulena Haxhiu, në një ceremoni zyrtare që do të zhvillohet këtë të shtunë.

Lajmi është bërë i ditur nga Presidenca përmes një njoftimi për mediat, ku theksohet se ceremonia do të nisë në orën 16:00.

Sipas agjendës zyrtare, akti ceremonial i dorëzim-pranimit të detyrës do të mbahet në ambientet e Kabinetit të Presidentes.

Kryetarja e Kuvendit Albulena Haxhiu do të jetë ushtruese e detyrës së presidentes, pasi Kuvendi ende nuk ka zgjedhur presidentin e ri. Ajo mund ta mbajë këtë post për 6 muaj.

Kuvendi ka afat deri më 28 prill për të zgjedhur presidentin e ri.

Vjosa Osmani është zgjedhur Presidente e Kosovës më 4 prill 2021. Ajo mori detyrën pesë vite më parë me përkrahjen e Lëvizjes Vetëvendosje, por nuk arriti të sigurojë një mandat të dytë, ndonëse kishte shprehur publikisht dëshirën për ta vazhduar atë.