Një ngjarje e rëndë është regjistruar në lagjen Pavarësia, pranë rrugës “Çipaj” në Vlorë, ku 63-vjeçari Ismail Aliaj ka humbur jetën pas një konflikti mes disa personave.

Sipas burimeve mjekësore, viktima ka pësuar goditje të forta në kokë, fytyrë dhe në zonën e grykës, të cilat rezultuan fatale. Pavarësisht ndihmës së dhënë, ai nuk arriti t’u mbijetojë plagëve të marra.

Gjatë konfliktit ka mbetur i lënduar lehtë edhe djali i tij Bajroni, i cili ndodhet jashtë rrezikut për jetën.

Burime nga hetimet bëjnë me dije se personat e përfshirë në konflikt kanë qenë të njohur me njëri-tjetrin, ndërsa ende nuk janë bërë publike shkaqet e përplasjes.

Policia e Vlorës ka nisur ndjekjen e autorëve dhe po punon për zbardhjen e plotë të rrethanave të ngjarjes.

Policia e Vlorës del me komunikatë:

Sot, rreth orës 15:00, në vendin e quajtur “Rruga e Çipave”, dyshohet se pas një konflikti të çastit për motive të dobëta, shtetasi I. A., 63 vjeç, është goditur me grushte nga dy shtetas, tashmë të identifikuar nga shërbimet e Policisë dhe vijon puna për kapjen e tyre.

Si pasojë e dëmtimeve, shtetasi I. A, ka humbur ndjenjat dhe është transportuar në Spitalin Rajonal Vlorë, ku më pas ka ndërruar jetë.

Grupi hetimor ndodhet në vendngjarje dhe po punon intensivisht për sqarimin e plotë të rrethanave të ngjarjes.