Një ngjarje e rëndë ka ndodhur në lagjen Pavarësia, pranë rrugës “Çipaj” në Vlorë, ku 63-vjeçari Ismail Aliaj ka ndërruar jetë pas një konflikti mes disa personave.

Sipas burimeve mjekësore, viktima ka marrë goditje në fytyrë dhe grykë, të cilat rezultuan fatale. Djali i tij Bajron Aliaj, mbeti i lënduar lehtë dhe ndodhet jashtë rrezikut për jetën.

Policia e Vlorës ka nisur ndjekjen e autorëve dhe vijon hetimet për të zbardhur rrethanat e ngjarjes.

Policia e Vlorës del me komunikatë:

Sot, rreth orës 15:00, në vendin e quajtur “Rruga e Çipave”, dyshohet se pas një konflikti të çastit për motive të dobëta, shtetasi I. A., 63 vjeç, është goditur me grushte nga dy shtetas, tashmë të identifikuar nga shërbimet e Policisë dhe vijon puna për kapjen e tyre.

Si pasojë e dëmtimeve, shtetasi I. A, ka humbur ndjenjat dhe është transportuar në Spitalin Rajonal Vlorë, ku më pas ka ndërruar jetë.

Grupi hetimor ndodhet në vendngjarje dhe po punon intensivisht për sqarimin e plotë të rrethanave të ngjarjes.