Kryeministri Edi Rama u ka kërkuar kryebashkiakëve në vend të hapin zyra të posaçme të ndihmës juridike për të lehtësuar procesin e legalizimeve për qytetarët.

Gjatë një komunikimi mbi funksionimin e kadastrës, ai theksoi nevojën për bashkëpunim më të ngushtë mes pushtetit vendor dhe institucioneve përgjegjëse, me qëllim ndërtimin e planeve të qarta dhe prioritare për trajtimin e aplikimeve.

Sipas Ramës, sistemi duhet të bëhet më i drejtë dhe transparent, duke i dhënë përparësi qytetarëve që kanë aplikuar më herët, si dhe duke përcaktuar zona specifike që do të trajtohen me prioritet.

Ai u ndal edhe te numri i lartë i ankesave për kadastrën, duke theksuar se një pjesë e tyre lidhen me aplikime të paplota ose të pasakta. Në këtë kuadër, hapja e zyrave të ndihmës juridike pranë bashkive do të ndihmojë qytetarët të kuptojnë më mirë procedurat dhe të shmangin gabimet gjatë aplikimit.

Sipas tij, kjo nismë pritet të ndiqet nga Ministria e Pushtetit Vendor dhe synon përmirësimin e shërbimit, si dhe reduktimin e vonesave në procesin e legalizimeve.