Në prag të Kupës së Botës 2026, po shtohen pikëpyetjet mbi pjesëmarrjen e Iranit, edhe pse kombëtarja aziatike e ka siguruar kualifikimin në fushë.

Presidenti i FIFA-s, Gianni Infantino, ka shprehur pritshmërinë që Irani të marrë pjesë në turneun që do të zhvillohet në Shtetet e Bashkuara, Kanada dhe Meksikë. Megjithatë, zhvillimet gjeopolitike dhe tensionet në rritje në Lindjen e Mesme po krijojnë pasiguri mbi këtë pjesëmarrje.

Përplasjet e vazhdueshme që përfshijnë Iranin dhe Izraelin kanë ngritur shqetësime lidhur me aspektet e sigurisë dhe logjistikës, sidomos për zhvillimin e ndeshjeve në territorin amerikan.

Dyshimet janë shtuar edhe pas deklaratave të ministrit iranian të sportit, Ahmad Donyamali, i cili ka lënë të hapur mundësinë e një mungese të Iranit në këtë kompeticion, duke e kthyer situatën në një çështje që tejkalon sportin.

Deri më tani, FIFA nuk ka marrë një vendim përfundimtar, por rregullorja parashikon mundësinë e zëvendësimit të një skuadre në raste të jashtëzakonshme.

Në këtë kontekst, Italia shihet si një nga alternativat kryesore për të zënë një vend të mundshëm vakant, duke u mbështetur në historinë dhe peshën e saj në futbollin ndërkombëtar.

Megjithatë, nuk përjashtohet që në një skenar të tillë të merren në konsideratë edhe përfaqësuese të tjera, përfshirë skuadra nga kontinenti afrikan, në varësi të vendimeve që do të merren nga organet drejtuese të futbollit botëror.