Spiro Dhimaleksi, 35 vjeç, i cili një ditë më parë mbajti peng dhe kërcënoi jetën e prindërve të tij në Himarë, është shtruar sot në Spitalin Psikiatrik “Ali Mihali”, ku po mbahet nën vëzhgim pas trajtimit mjekësor që mori në Spitalin e Vlorës për plagë të shkaktuara me mjet prerës.

Sipas mjekëve psikiatër, ai nuk rezulton të ketë një kartelë me diagnozë për probleme të shëndetit mendor, por është përdorues i lëndëve narkotike në një fazë të rënduar. Mjekët bëjnë të ditur se gjatë komunikimit ai ka qenë më i kthjellët, megjithatë do të jetë e nevojshme trajtimi nga specialistë të toksikologjisë.

Në dëshminë e dhënë për policinë, 35-vjeçari ka deklaruar se veprimin e ndërmori pasi dyshonte se prindërit e tij synonin t’i merrnin pronat.

Ngjarja ndodhi në Himarë, ku Dhimaleksi, në një gjendje të rënduar psikologjike, kishte izoluar prindërit e tij, të moshës 60 dhe 65 vjeç, duke i kërcënuar me thikë. Pas marrjes së njoftimit, forcat e policisë ndërhynë menjëherë dhe nisën negociatat me të. Pas më shumë se një ore, një efektiv arriti të vendoste komunikim të drejtpërdrejtë, duke ulur tensionin e situatës.

Gjatë ndërhyrjes, 35-vjeçari tentoi të dëmtonte veten, duke i shkaktuar plagë në zonën e barkut, por policia reagoi në kohë, e neutralizoi dhe i hoqi mjetin prerës, duke bërë të mundur shpëtimin e prindërve pa lëndime.

Pas shoqërimit në Komisariatin e Himarës dhe trajtimit në Spitalin e Vlorës, ai është referuar për trajtim të specializuar psikiatrik. Ndërkohë, prindërit janë marrë në pyetje për të sqaruar plotësisht rrethanat e ngjarjes.

Negociatat

Pas më shumë se një ore negociatash intensive, një efektiv i policisë, banor i zonës, ka arritur të komunikojë drejtpërdrejt me autorin, duke ndikuar në uljen e tensionit. Në momentin e ndërhyrjes, 35-vjeçari ka tentuar të dëmtojë veten me mjetin prerës, duke shkaktuar plagë në zonën e barkut.

Punonjësit e policisë kanë ndërhyrë menjëherë, duke e neutralizuar dhe duke i hequr mjetin prerës, çka bëri të mundur shpëtimin e dy prindërve pa lëndime. Më pas, 35-vjeçari është shoqëruar fillimisht në Komisariatin e Policisë Himarë dhe më tej në Vlorë, ku ka marrë ndihmën mjekësore në spitalin rajonal, si dhe është referuar për trajtim në shërbimet psikiatrike.