Një qendër masazhesh në Tiranë u zbulua të jepte shërbime seksi me pagesë për klientët e interesuar.

Zbulimi erdhi nga një punë tremujore e policisë e cila u kurorëzua me kapjen në flagrancë të një gruaje tutore dhe një tjetre që shiste trupin me pagesë.

Shërbimet e Komisariatit të Policisë Nr. 2, thanë sot zyrtarish se si rezultat i një hetimi 3-mujor, të kryer në koordinim me Prokurorinë e Tiranës, arrestuan në flagrancë, për veprën penale “Shfrytëzimi i prostitucionit”, shtetasen B. G., 40 vjeçe, si dhe proceduan penalisht në gjendje të lirë, për veprën penale “Prostitucioni”, një 41-vjeçare.

Në ambientet e subjektit (qendër fizioterapeutike), në rrugën “Ismail Qemali”, në pronësi të shtetases B. G., 40 vjeçe, u konstatua se shfrytëzohej për prostitucion një 41-vjeçare.

Në cilësinë e provës materiale u sekuestrua një shumë parash e përfituar nga kjo veprimtari e kundërligjshme.

Materialet procedurale iu referuan Prokurorisë së Tiranës, për veprime të mëtejshme.