Një sulm me dron ka shkaktuar shpërthimin e një zjarri në rafinerinë e naftës Mina Al-Ahmadi në Kuvajt, duke ngritur shqetësime për sigurinë e infrastrukturës energjetike në rajon.

Sipas raportimeve të Sky News Arabia, flakët përfshinë disa njësi operative të rafinerisë, ndërsa ekipet e emergjencës ndërhynë menjëherë për të vënë situatën nën kontroll dhe për të parandaluar përhapjen e mëtejshme të zjarrit.

Korporata e Naftës së Kuvajtit konfirmoi se nuk ka pasur viktima si pasojë e incidentit, ndërsa vijojnë përpjekjet për stabilizimin e plotë të situatës dhe vlerësimin e dëmeve.

Autoritetet nuk kanë dhënë ende detaje të mëtejshme mbi autorët e mundshëm të sulmit, ndërsa ngjarja vjen në një moment tensionesh të larta në rajonin e Lindjes së Mesme.