Një studim i realizuar nga Emory University ka hedhur dritë mbi ndikimin që ka diferenca në moshë në qëndrueshmërinë e marrëdhënieve në çift, duke nxitur diskutime të reja mbi këtë fenomen.

Sipas të dhënave të përftuara nga analizimi i rreth 3 mijë personave, rezulton se sa më e madhe të jetë diferenca në moshë mes partnerëve, aq më i lartë është edhe rreziku për ndarje. Konkretisht, çiftet me një diferencë prej rreth 5 vitesh paraqesin një probabilitet më të lartë ndarjeje krahasuar me ata me diferencë minimale.

Ky rrezik rritet ndjeshëm në rastet kur diferenca arrin 10 apo 20 vite, ndërsa në marrëdhëniet ku partnerët kanë një hendek prej rreth 30 vitesh, gjasat për ndarje janë dukshëm më të larta.

Në të kundërt, studimi thekson se çiftet me diferencë shumë të vogël në moshë, veçanërisht ata me vetëm një vit diferencë, kanë më shumë gjasa të ruajnë stabilitetin e lidhjes.

Megjithatë, studiuesit nënvizojnë se këto rezultate nuk janë përfundimtare dhe se në ecurinë e një marrëdhënieje ndikojnë edhe faktorë të tjerë thelbësorë, si komunikimi, mirëkuptimi dhe cilësia e kohës së kaluar së bashku.

Një tjetër element i evidentuar është kohëzgjatja e lidhjes: çiftet që qëndrojnë bashkë për periudha më të gjata kanë më pak gjasa të ndahen, çka sugjeron se stabiliteti rritet me kalimin e kohës.

Studimi rikthen në vëmendje debatet mbi lidhjet me diferencë të madhe moshe, duke theksuar se, pavarësisht tendencave statistikore, çdo marrëdhënie mbetet unike dhe nuk mund të përcaktohet vetëm nga shifrat.