Një aksident i rëndë në një fabrikë në Greqi ka lënë të plagosur një 40-vjeçare me origjinë shqiptare, e cila aktualisht ndodhet në spital jashtë rrezikut për jetën.

Sipas raportimeve të mediave vendase, gruaja ka pësuar dëmtime serioze në kokë pasi flokët e saj janë kapur nga një makineri gjatë procesit të punës. Si pasojë, ajo ka humbur një sasi të konsiderueshme flokësh dhe ka pësuar dëmtime në lëkurën e ballit.

E plagosura është transportuar në spital në gjendje të rëndë, ndërsa mjekët kanë konstatuar se, pavarësisht traumës, ajo ishte e vetëdijshme dhe në gjendje të lëvizte. Sipas të njëjtave burime, gruaja paraqitej e tronditur dhe nuk komunikonte.

Ngjarja ka nxjerrë në pah edhe problematikën e punësimit informal, pasi raportohet se 40-vjeçarja ndodhej dhe punonte në mënyrë të paligjshme në fabrikë.

Lidhur me rastin, autoritetet kanë shoqëruar dhe arrestuar përkohësisht punëdhënësin, një shtetas grek 42-vjeçar, i cili më pas është liruar me urdhër verbal.

Hetimet vijojnë për të zbardhur rrethanat e plota të aksidentit dhe për të verifikuar kushtet e sigurisë në vendin e punës.