Gëzim Vija 78-vjeçar u gjet i vdekur sot në fshatin Bulgarec, dhe policia konfirmon se shkaku i vdekjes nuk ka të bëjë me arsyet natyrore, por me një ngjarje kriminale. Sipas njoftimeve zyrtare, i moshuari është goditur në kokë me mjete të forta, duke i shkaktuar vdekjen.

Autoritetet kanë shoqëruar në komisariat të gjithë familjarët dhe të afërmit e viktimës për marrjen e deklarimeve lidhur me konflikte të mundshme. Policia dhe prokuroria po përdorin metoda speciale hetimi për të zbardhur dinamikën e ngjarjes, motivet dhe për të identifikuar autorin ose autorët.

Hetimet po zhvillohen në dy pista: vrasje e lidhur me një tentativë vjedhjeje, megjithëse në banesën e viktimës nuk janë konstatuar sende me vlerë të marra, dhe vrasje për motive të tjera personale. Autoritetet nuk kanë dhënë ende detaje të mëtejshme mbi përparimin e hetimeve.