Deputetja e Partia Demokratike, Jozefina Topalli, iu drejtua kryetarit të Kuvendit, Niko Peleshi, duke kërkuar përjashtimin e kreut të grupit parlamentar të Partia Socialiste, Taulant Balla, pas tensioneve të shumta gjatë seancës plenare.

Topalli e cilësoi si provokim kërkesën e Ballës për të mbajtur një minutë heshtje në përkujtim të 35-vjetorit të masakrës së 2 prillit 1991 në Shkodër dhe u ndal te sulmet e tij ndaj grave të opozitës në sallë.

“Ju lutem zoti kryetar, kapeni prej zhelesh e nxirreni jashtë”, tha ajo, duke shtuar se fjalori i përdorur dhe kërcënimet gjatë seancës janë të papranueshme dhe nuk kanë precedent në historinë e Kuvendit.

Deputetja theksoi se reagimi i Ballës shkel dinjitetin e grave dhe përbën provokim mbi dhimbjen e familjeve të dëshmorëve të 2 prillit 1991. Ajo kërkoi që kryetari i Kuvendit të përdorë të gjitha kompetencat ligjore për të ruajtur rregullin dhe dinjitetin e seancave plenare.