Një 36-vjeçar shqiptar është arrestuar nga karabinierët në Comiso, nën dyshimin për zjarrvënie të qëllimshme në banesën e ish-partneres së tij.

Sipas autoriteteve italiane, ngjarja ka ndodhur disa ditë më parë në zonën “Corso Ho Chi Min”, ku i dyshuari dyshohet se i ka vënë zjarrin apartamentit duke përdorur lëndë të ndezshme, pas një konflikti të radhës mes tyre.

Flakët, sipas raportimeve të zjarrfikësve, shkaktuan dëme të konsiderueshme në banesë, por nuk u përhapën në ndërtesat përreth.

Si pasojë e incidentit, të dy personat mbetën të lënduar dhe u transportuan për trajtim në spitalin Ospedale Guzzardi. Burime mjekësore bëjnë me dije se, pavarësisht djegieve në trup dhe helmimit nga monoksidi i karbonit, gjendja e tyre nuk paraqet rrezik për jetën.

Pas daljes nga spitali, i dyshuari u arrestua dhe u transferua në burgun e Ragusa, ku po mbahet në dispozicion të autoriteteve gjyqësore.

Hetimet paraprake tregojnë se shkak i ngjarjes dyshohet të jenë konfliktet e vazhdueshme mes çiftit dhe ndarja e fundit, të cilën i dyshuari nuk e kishte pranuar.