Seanca plenare e ditës së sotme në Kuvend është shoqëruar me tensione dhe debate mes deputetëve të opozitës dhe mazhorancës.

Situata u tensionua pasi kryetari i Kuvendit, Niko Peleshi, i ndërpreu fjalën deputetit të opozitës, Flamur Noka. Në reagim, deputetët e opozitës bllokuan foltoren, duke penguar vijimin normal të seancës.

Më pas, fjala iu dha nga vendi deputetes së Partisë Socialiste, Bora Muzhaqi. Gjatë momentit që ajo nisi të fliste, deputetja e Partisë Demokratike, Elda Hoti, iu afrua dhe i hoqi kartën e mikrofonit.

Në debat ndërhyri edhe Taulant Balla, duke shkëmbyer replika të ashpra me Hotin. Nga komunikimi i tensionuar u dëgjuan pjesërisht deklarata si “Ta tregoj unë ty”, ndërsa Hoti reagoi me fjalët: “Pse, kush jam unë, shoqja jote? Kush je ti?”

Për shkak të situatës së krijuar, seanca u ndërpre për disa minuta.