Diskutimet mes shumicës dhe pakicës në komisionin e posaçëm për reformën zgjedhore rikthejnë kushtëzimet mes palëve.

Opozita, duke e cilësuar sistemin aktual si favorizues për partinë në pushtet, kërkon që drafti i komisionit të përfshijë edhe rregullat për koalicionet parazgjedhore.

Partia Socialiste nuk e kundërshton kategorikisht këtë kërkesë, por e kushtëzon çdo ndryshim të sistemit edhe me uljen e numrit të deputetëve. Pas idesë që hodhi Rama, tani socialistët janë vënë në gjueti të kompromisit me opozitën që të reduktohet nga 140 në 101, numri i deputetëve, paçka se shumë nga deputetët aktualë nuk do të ishin më në 2029.

Nga ana tjetër, PS ka propozuar ngritjen e një komisioni të posaçëm për Reformën Kushtetuese, i cili do të përfshijë edhe çështjet që lidhen me sistemin zgjedhor.

Damian Gjiknuri ka shprehur gatishmërinë për të diskutuar ndryshime të mundshme, duke përfshirë edhe rishikimin e numrit të deputetëve, dhe theksoi se këto çështje mund të trajtohen të përmbledhura në një komision tjetër të përbashkët.