Tiranë – Ministria e Brendshme ka përzgjedhur 20 institucione arsimore për t’i përfshirë në fazën e parë të projektit “Smart City”, i cili synon rritjen e sigurisë përmes përdorimit të kamerave inteligjente dhe teknologjisë së avancuar.

Sipas një dokumenti të Policisë së Shtetit, konkretisht nga Drejtoria Vendore e Policisë Tiranë, lista përfshin shkolla 9-vjeçare dhe të mesme, ku do të instalohet sistemi i survejimit me inteligjencë artificiale. Dokumenti përmban të dhëna mbi vendndodhjen, numrin e kamerave dhe numrin e nxënësve për secilin institucion.

Ndër shkollat e përzgjedhura janë:

Shkolla 9-vjeçare “Fan Noli”, rruga “Qemal Stafa” – 11 kamera, 1125 nxënës Shkolla e mesme Teknike-Ekonomike, rruga “Myrtezim Këlliçi” – 19 kamera, 600 nxënës Shkolla 9-vjeçare “Marie Logoreci”, rruga “Ali Shefqeti” – 12 kamera, 478 nxënës Shkolla e mesme “Aleks Buda”, Laprakë – 20 kamera, 700 nxënës Shkolla 9-vjeçare “Kongresi i Manastirit”, rruga “Tre Dëshmorët” – 20 kamera, 1460 nxënës Shkolla e mesme profesionale Kamëz, rruga “Montreal” – 17 kamera, 1540 nxënës Shkolla 9-vjeçare “Ramazan Jarani”, rruga “Selaudin Bekteshi” – 17 kamera, 478 nxënës Shkolla e mesme profesionale “Karl Gega”, rruga “Bedri Karapici” – 30 kamera, 857 nxënës Shkolla e mesme “Ibrahim Rugova”, Kamëz – 23 kamera, 1116 nxënës Shkolla e mesme “Isa Boletini”, Paskuqan – 22 kamera, 410 nxënës Shkolla e mesme “Qemal Stafa”, rruga e Durrësit – 31 kamera, 1300 nxënës Shkolla 9-vjeçare “Ahmet Gashi”, rruga “Dritan Hoxha” – 14 kamera, 893 nxënës Shkolla 9-vjeçare “Gjon Buzuku”, rruga “Kahreman Ylli” – 17 kamera, 870 nxënës Shkolla e mesme “Partizani”, rruga e Dibrës – 12 kamera, 582 nxënës Shkolla 9-vjeçare “Bajram Curri”, rruga “Niko Avrami” – 22 kamera, 482 nxënës Shkolla 9-vjeçare “Avni Rustemi”, rruga e Bogdanëve – 24 kamera, 752 nxënës Shkolla 9-vjeçare “Jeronim De Rada”, rruga e Durrësit – 13 kamera, 710 nxënës Shkolla 9-vjeçare “Vaçe Zela”, rruga “Eshref Frashëri” – 15 kamera, 502 nxënës Gjimnazi Petro Nini Luarasi, rruga “Sami Frashëri” – 19 kamera, 1022 nxënës Shkolla 9-vjeçare “Hoxha Tahsin”, rruga “Hoxha Tahsin” – 17 kamera, 635 nxënës

Projekti po zbatohet nga kompania Presight AI, pjesë e grupit G42, me seli në Emiratet e Bashkuara Arabe.

Megjithatë, iniciativa ka ngjallur debat, pasi ekspertë të të drejtave digjitale kanë ngritur shqetësime për ndikimin e mundshëm në privatësinë e qytetarëve, për shkak të përdorimit të inteligjencës artificiale dhe analizimit të të dhënave.

Nga ana tjetër, institucionet shtetërore theksojnë se projekti “Smart City” synon forcimin e sigurisë publike dhe parandalimin e kriminalitetit përmes teknologjisë.

Fillimisht i parashikuar me një kosto prej 60 milionë dollarësh, projekti është rishikuar në rritje, duke u kthyer në një nga investimet më të mëdha në sistemet e survejimit urban në Shqipëri.