Kryeministri dhe njëherazi kryetari i Partia Socialiste e Shqipërisë, Edi Rama, ka komentuar çështjen e çmimit të naftës gjatë një takimi në Asamblenë socialiste në Njësinë 7 në Tiranë.

Rama theksoi se rritja e çmimeve të karburanteve është një fenomen global, ndërsa shtoi se qeveria ka analizuar mundësinë e heqjes së taksës së qarkullimit nga çmimi i naftës.

Sipas tij, një vendim i tillë do të sillte ulje të menjëhershme të çmimit, por do të kishte pasoja financiare për qytetarët që zotërojnë automjete.

“Nëse heqim taksën e qarkullimit, çmimi do të bjerë, por të gjithë ata që kanë një automjet do të paguajnë mesatarisht katër herë më shumë,” – u shpreh Rama.

Ai sqaroi se filozofia aktuale e taksimit synon që barrën më të madhe ta mbajnë ata që konsumojnë më shumë karburant, duke e lidhur këtë edhe me nivelin e ndotjes.

Kryeministri theksoi se kjo qasje konsiderohet më e drejtë, pasi sipas tij, ata që përdorin më shumë automjetin kontribuojnë proporcionalisht më shumë në koston që lidhet me përdorimin dhe ndikimin mjedisor.