TIRANË – Partia Demokratike ka denoncuar mungesën e mundësisë për qytetarët për të kryer analizat laboratorike në QSUT pas datës 20 të këtij muaji, duke e cilësuar situatën si skandal të koncesionit të sterilizimit.

Në një konferencë për media nga Kryesia e Kuvendi i Shqipërisë, deputeti i PD-së, Bardh Spahia, tha se qytetarët po hasin vështirësi të mëdha për kryerjen e analizave laboratorike dhe kërkoi zhvillimin e një interpelance me Evis Sala.

“Partia Demokratike kërkon një interpelancë në Parlament për çështjen e sterilizimit. Vetë ministrja e ka pranuar publikisht se qytetarët nuk kanë mundësi të kryejnë analizat”, deklaroi Spahia.

Ai akuzoi gjithashtu qeverinë se po synon përfitime nga koncesioni tashmë nën administrimin e shtetit dhe i bëri thirrje SPAK të nisë hetimet për këtë rast.