Këshilli i Ministrave ka miratuar Skemën Kombëtare të Bujqësisë për vitin 2026, me një fond total prej 2.5 miliardë lekësh (rreth 25 milionë euro), duke synuar rritjen e mbështetjes financiare për fermerët dhe zhvillimin e sektorit bujqësor.

Sipas Ministria e Bujqësisë dhe Zhvillimit Rural, skema e re parashikon rritje të ndjeshme të subvencioneve direkte për blegtorinë dhe prodhimin bujqësor, si dhe zgjerim të kategorive përfituese.

Rritje e subvencioneve për blegtorinë

Mbështetja financiare për disa nga sektorët kryesorë është rritur krahasuar me vitin 2025:

për lopët: nga 10 mijë në 12 mijë lekë për krerë; për bagëtitë e imëta: nga 1,200 në 1,500 lekë për krerë; për bletarinë: nga 1,000 në 2,000 lekë për zgjua.

Për herë të parë, skema përfshin edhe mbështetje për sektorin e derrave, me 7 mijë lekë për çdo dosë, për ferma me të paktën 5 krerë.

Ulje e pragjeve për përfitim

Skema e re synon të jetë më gjithëpërfshirëse, duke ulur ndjeshëm pragjet minimale:

nga 10 në 5 krerë për lopët; nga 100 në 50 krerë për bagëtitë e imëta; nga 50 në 25 koshere për bletarinë.

Kjo pritet të rrisë numrin e fermerëve përfitues dhe të lehtësojë aksesin në subvencione.

Mbështetje për prodhimin dhe teknologjinë

Një tjetër risi është rritja e mbështetjes për kontrollin biologjik të dëmtuesve në sera, që arrin deri në 70% të kostove, nga 50% që ishte më parë.

Gjithashtu, për herë të parë zgjerohet mbështetja për pagesa sipas sipërfaqes së mbjellë, ku fermerët me mbi 3 hektarë përfitojnë 10 mijë lekë për çdo hektar.

Investime dhe përfitime shtesë

Skema parashikon mbështetje për:

fermerët e rinj, me financim deri në 70% të investimit (maksimumi 1 milion lekë); ndërtimin dhe përmirësimin e fermave dhe staneve; mekanizimin bujqësor; akuakulturën, me mbështetje deri në 200 mijë lekë për blerjen e rasatit.

Shoqëritë e bashkëpunimit bujqësor (SHBB) do të vijojnë të përfitojnë mbështetje të plotë, deri në 100% të masës së parashikuar.

Qëllimi i skemës

Skema Kombëtare e Bujqësisë 2026 synon rritjen e konkurrueshmërisë së produkteve bujqësore dhe blegtorale, uljen e kostove të prodhimit dhe përafrimin e skemave mbështetëse me praktikat e Bashkimi Evropian.

Vendimi hyn në fuqi pas botimit në Fletoren Zyrtare dhe pritet të ketë ndikim të drejtpërdrejtë në zhvillimin e qëndrueshëm të sektorit rural në vend.