Emërimi i Skënder Hitaj në krye të Policisë së Shtetit ka shkaktuar reagime të menjëhershme në skenën politike, vetëm pak orë pas miratimit të vendimit nga Këshilli i Ministrave.

Sali Berisha ka hedhur akuza ndaj qeverisë, duke e cilësuar Hitajn si një person të afërt me Belinda Balluku.

Në përgjigje të këtyre deklaratave, ministri i Brendshëm, Besfort Lamallari, ka mbrojtur vendimin për emërimin e drejtuesit të ri të policisë. Ai e cilësoi Hitajn si një oficer karriere me përvojë të gjatë në strukturat e rendit, i cili ka drejtuar disa qarqe dhe ka spikatur për profesionalizëm dhe integritet.

Lamallari theksoi se përzgjedhja e tij nuk ka qenë një vendim i njëanshëm, por rezultat i një procesi konkurrues dhe të monitoruar nga partnerë ndërkombëtarë, përfshirë përfaqësues të Bashkimi Evropian, të cilët kanë marrë pjesë në fazat e intervistimit dhe vlerësimit të kandidatëve.

Duke komentuar akuzat e opozitës, ministri u shpreh se sulmet politike ndaj drejtuesve të Policisë së Shtetit janë bërë tashmë të zakonshme, pavarësisht performancës së tyre.

Ai nënvizoi se institucionit të policisë duhet t’i jepet besimi i nevojshëm për të përmbushur detyrat e tij, ndërsa shtoi se si drejtuesit aktualë, ashtu edhe ata që do të vijnë në të ardhmen, duhet të jenë të përgatitur për kritika dhe akuza të vazhdueshme nga opozita.