Mbrëmjen ekaluar nisi spektakli Ferma VIP në edicionin e tij të tretë, ku një nga risitë kryesore është prania e Ermal Mamaqi në rolin e opinionistit.

Në një intervistë për emisionin “Mes Dritë”, Mamaqi foli për rikthimin e tij në televizion, duke e cilësuar si një moment të rëndësishëm në karrierë.

“Është një rikthim në vendin ku unë u zgjerova si artist. Ka qenë një nga frikërat e mia më të mëdha të bëhesha prezantues apo showman. Nuk ka lidhje me të qenurit aktor. Ishte një ‘dhimbje’ e madhe në fillim, por Vizion Plus dhe Olta Dulaku më bënë ta provoja te ‘Dancing with the Stars’ dhe të zhvilloja potencialin tim”, u shpreh ai.

Mamaqi kujtoi gjithashtu fillimet e tij në televizion, të lidhura me moderatoren e “Ferma VIP 3”, Arbana Osmani.

“Hera e parë që kam punuar në televizion ka qenë pikërisht me Arbanën në vitin 2003. Atëherë e urrenim njëri-tjetrin, mendonim si ta vrisnim njëri-tjetrin çdo mëngjes. Por me pjekurinë, fillon e vlerëson kolegun për të mirat që ka”, rrëfeu ai.

Ai ndau edhe reagimin e bashkëshortes së tij, Amarda Toska, lidhur me këtë eksperiencë të re. Fillimisht, sipas tij, ajo mendoi se ai do të ishte pjesë e spektaklit si fermer dhe reagoi me habi, por më pas e mbështeti në rolin e opinionistit.