Forcat Mbrojtëse të Izraelit kanë konfirmuar se një raketë është lëshuar nga Jemeni drejt jugut të Izraeli. Ky konsiderohet sulmi i parë i drejtpërdrejtë nga Huthit, të mbështetur nga Irani, që nga fillimi i operacionit “Roaring Lion” më 28 shkurt.

Sulmi aktivizoi sirenat në Beersheba dhe në zonat përreth në shkretëtirën Negev. Sipas ushtrisë izraelite, sistemet e mbrojtjes ajrore reaguan me sukses duke neutralizuar kërcënimin. Banorëve iu kërkua fillimisht të ndiqnin udhëzimet e autoriteteve, ndërsa më pak se 15 minuta më vonë u njoftua se situata ishte e sigurt. Deri tani nuk raportohen viktima apo goditje direkte.

Ky zhvillim vjen menjëherë pasi një zëdhënës i Huthive paralajmëroi hyrjen në luftë në Lindjen e Mesme, nëse vazhdojnë sulmet ndaj Iranit.

Në një deklaratë të publikuar në platformën Telegram, zëdhënësi i forcave të armatosura jemenase, Yahya Saree, tha se grupi është i gatshëm për ndërhyrje të drejtpërdrejtë ushtarake në disa kushte: nëse shtete të tjera i bashkohen SHBA-së dhe Izraelit kundër Iranit; nëse Deti i Kuq përdoret për operacione ushtarake kundër Iranit apo vendeve myslimane; si dhe në rast të përshkallëzimit të mëtejshëm të konfliktit.

Huthit, të cilët e konsiderojnë veten pjesë të “boshtit të rezistencës” të udhëhequr nga Irani, kanë kërcënuar më herët me sulme të koordinuara me grupe të tjera pro-iraniane si Hamasi dhe Hezbollahu. Megjithëse deri tani kishin shmangur përfshirjen direkte në këtë konflikt, një nga drejtuesit e tyre deklaroi se janë të gatshëm të mbështesin përpjekjet ushtarake të Teheranit.

“Jemi plotësisht të gatshëm ushtarakisht me të gjitha opsionet. Sa i përket përcaktimit të ‘orës zero’, kjo i lihet udhëheqjes”, citohet të ketë thënë ai, duke shtuar se po ndjekin zhvillimet në terren dhe do të veprojnë në momentin e duhur.

Sulmi i së shtunës mund të sinjalizojë hapjen e një fronti të ri në rajon, duke rritur shqetësimet për përshkallëzim të mëtejshëm dhe pasoja në ekonominë globale, veçanërisht në tregjet e naftës. Gjatë konflikteve të mëparshme në Gazë, Huthit kanë sulmuar anije tregtare në Detin e Kuq, duke shkaktuar probleme serioze në transportin detar dhe tregtinë ndërkombëtare.