Tiranë, 26 Mars 2026

Kryeministri Edi Rama deklaroi se Shqipëria nuk ka më shumë korrupsion se vendet e tjera europiane, duke kundërshtuar stereotipet që lidhen me krimin e organizuar dhe perceptimet negative për vendin.

Gjatë fjalës së tij në eventin “Matchmaker Albania”, Rama theksoi se zhvillimet ekonomike dhe rritja e investimeve janë prova konkrete e ndryshimit të imazhit të Shqipërisë.

“Kur njerëzit flasin për Shqipërinë bien pre e disa stereotipeve si korrupsioni dhe krimi i organizuar. Por kjo nuk është Shqipëria. Ne nuk kemi më shumë korrupsion se çdo vend tjetër,” u shpreh ai.

Sipas kryeministrit, vendi ka arritur të tërheqë rreth 1.6 miliardë euro investime të huaja në vit, ndërsa numri i turistëve ka arritur në 12 milionë, duke e kthyer Shqipërinë në një destinacion gjithnjë e më tërheqës.

Rama shtoi se qeveria synon rritjen e eksporteve në 1 miliard euro, zhvillimin e ekonomisë digjitale dhe arritjen e sovranitetit të plotë energjetik deri në fund të dekadës, përmes diversifikimit dhe inovacionit në sektorin e energjisë.

Ai veçoi gjithashtu turizmin dhe bujqësinë si sektorë kyç të zhvillimit, duke theksuar se vendi po synon investime më cilësore dhe një model të ri zhvillimi ekonomik.