FIER, 24 mars 2026 – Janë zbardhur detaje të reja nga tragjedia familjare në Roskovec, ku i moshuari Shefit Rrapaj vrau bashkëshorten e tij, Dashuria Rrapaj, dhe më pas i dha fund jetës brenda banesës.

Sipas burimeve policore, djali i çiftit ka dëshmuar se në momentin e ngjarjes ndodhej në Fier, ku kishte shkuar për një konsultë mjekësore. Lëvizjet e tij janë verifikuar edhe përmes kamerave të sigurisë.

Në dëshminë e tij, ai ka treguar se i ati kishte natyrë konfliktuale dhe se tensionet në familje kishin qenë të vazhdueshme. Sipas tij, përplasja e fundit kishte ndodhur rreth 10 ditë para ngjarjes, për një arsye banale, pasi ai kishte hedhur pleh në patatet e mbjella në oborr. Ky debat kishte përfunduar edhe në komisariatin e Roskovecit, ndërsa nëna, sipas tij, i dilte shpesh në mbrojtje.

Djali ka rrëfyer se, pasi është kthyer nga Fieri, i ka gjetur të dy prindërit pa shenja jete në banesë. Fillimisht ka njoftuar një të afërm dhe më pas policinë.

Nga hetimet paraprake rezulton se arma e përdorur në krim është një pushkë e vjetër, e cila dyshohet se mbahej e fshehur që prej vitit 1997. Ajo është gjetur e mbuluar me dhe dhe dyshohet se është përdorur dy herë: një herë për vrasjen e bashkëshortes dhe më pas nga autori për t’i dhënë fund jetës.

Grupi hetimor vijon punën për zbardhjen e plotë të rrethanave të kësaj ngjarjeje të rëndë familjare.