Tiranë – Sot mbahet seanca e dytë e gjyqit në themel për kryebashkiakun e Tiranës, Erion Veliaj, bashkëshorten e tij, Ajola Xoxa, si dhe për 28 persona dhe shoqëri të përfshira në të njëjtën dosje.

Në seancën e parë, të zhvilluar më 9 mars, Gjykata e Posaçme kundër Korrupsionit dhe Krimit të Organizuar (GJKKO) pranoi kërkesën e përsëritur të Veliajt për t’u njohur me të gjitha aktet e dosjes hetimore, duke i dhënë atij mundësinë për një mbrojtje më të plotë.

Veliaj nuk ishte i pranishëm në atë seancë dhe u përfaqësua nga avokatja e caktuar kryesisht, Valentina Teodoresku. Në një deklaratë, ai pretendoi se nuk ishte zhvilluar ende seanca paraprake dhe se, sipas tij, çështja nuk mund të kalonte në fazën e gjykimit në themel.

Një ditë pas pranimit të kërkesës nga GJKKO, Prokuroria e Posaçme (SPAK), përmes agjentëve të Byrosë Kombëtare të Hetimit, i dorëzoi 28 mijë faqe materiale nga 72 fashikujt e dosjes, në funksion të së drejtës për mbrojtje efektive.

Në seancën e parë mungoi edhe Ajola Xoxa, e cila u përfaqësua nga avokati Maks Haxhia. Ky i fundit informoi gjykatën se ajo ndodhet në gjendje shtatzënie dhe, për arsye shëndetësore, i është ndaluar lëvizja nga mjeku.

Po ashtu, munguan fizikisht edhe të pandehurit e tjerë – Klotilda Bushka, Meriman Palushi, Fatmir Bektashi dhe Sokol Kryeziu – të cilët u përfaqësuan nga avokatët e tyre. I vetmi i pandehur që u paraqit personalisht ishte biznesmeni Elman Abule, i cili deklaroi se do të jetë i pranishëm edhe në vijim të procesit.

Gjykata e Posaçme vendosi kalimin për gjykim të dosjes më 9 shkurt, ndërsa kryebashkiaku i Tiranës ndodhet në arrest që prej 10 shkurtit 2025. SPAK kishte depozituar kërkesën për kalimin e çështjes për gjykim rreth pesë muaj më parë.