Policia e Vlorë ka goditur një rast të mbajtjes pa leje të municionit luftarak dhe lëndëve plasëse, në kuadër të goditjeve të vazhdueshme ndaj veprimtarive kriminale.

Sipas njoftimit zyrtar, aksioni u zhvillua mbi bazën e informacioneve të siguruara në rrugë operative nga specialistët e Seksionit për Hetimin e Krimeve në Komisariatin e Policisë Vlorë.

Gjatë kontrollit të ushtruar në banesën e shtetasit A. C., 35 vjeç, shërbimet e Policisë gjetën dhe sekuestruan, në cilësinë e provës materiale, 158 fishekë luftarakë dhe një kallëp lënde plasëse, të dyshuar si tritol.

Në përfundim të veprimeve procedurale, 35-vjeçari u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe municionit”.

Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme.