Shqipëri – Besimtarët bektashianë festojnë sot Ditën e Sulltan Nevruzit, e cila përkon me ditëlindjen e Imam Aliut në Qabe dhe simbolizon ringjalljen, shpresën dhe fillimin e një dite të re.

Kryeministri Edi Rama uroi besimtarët me disa pamje nga teqeja e Helvetive në Berat, një nga më të bukurat në Ballkan, ku qetësia dhe harmonia janë shenja e besimit dhe përkushtimit shpirtëror.

Fjala “Nevruz” do të thotë “Dita e re” në persisht, ndërsa “Sulltan” është titull i lartë. Në Shqipëri, kjo ditë filloi të festohej që nga shekujt XIV, me përhapjen e bektashizmit, dhe përkon me ditëlindjen e Imam Aliut, dhëndrit të profetit Muhamed dhe një nga imamët e mëdhenj të të gjitha kohërave.

Siç ka shkruar poeti Naim Frashëri:

“Sot është një ditë e re që përsëritet moti, lind Vera, lind ngrohtësia, lind Aliu, lind vet Zoti.”

Imam Aliu njihet për diturinë, drejtësinë dhe përpjekjen për përparimin njerëzor. Ai la pas tre parime të përhershme: shkallën e të menduarit, unitetin njerëzor dhe drejtësinë, duke mbetur simbol i përhershëm i besimtarëve dhe dijetarëve.

Traditat dhe festimet

Në këtë ditë, besimtarët pijnë një gotë qumësht, që simbolizon lindjen e një dite të re. 22 marsi shënon gjithashtu 31-vjetorin e rihapjes së Kryegjyshatës Botërore Bektashiane, një event ku mori pjesë edhe Nënë Tereza.

Gatimet tradicionale përfshijnë:

Byrek me 12 lloje barishtesh (spinaq, lëpjetë, majdanoz, lakër, kopër, gjethe prasi, labot, qepë, oriz, etj.) me një monedhë metalike brenda; ai që e gjen monedhën konsiderohet me fat për vitin që vjen. Përshesh me pulë ose mish qengji, qengji i pjekur. Sultiash, ëmbëlsira karakteristike e ditës, përbërë nga qumësht, oriz dhe sherbet. Në disa raste, gatuhet edhe kabuni me oriz, lëng mishi, sheqer, rrush të thatë dhe arra.

Kjo festë simbolizon ringjalljen e jetës, shpresën dhe begatinë, duke qenë një nga ditët më të shënuara për komunitetin bektashian.