Tiranë, 21 Mars 2026

Kryeministri Edi Rama ka përcaktuar kriteret që duhet të plotësojnë kryebashkiakët që synojnë të rikandidojnë në zgjedhjet lokale të vitit të ardhshëm.

Gjatë fjalës së tij në Asamblenë e Partisë Socialiste, Rama theksoi se çdo kandidat për një mandat të ri duhet të ketë rezultate konkrete në zhvillimin e territorit, veçanërisht në zonat rurale.

“Nuk do të ketë asnjë kandidat për t’u rikandiduar si kryetar bashkie pa 10 kontrata të firmosura në kuadër të paketës së maleve dhe pa 3 ndërmarrje të përbashkëta të miratuara,” deklaroi ai.

Sipas kryeministrit, reforma territoriale u ka dhënë bashkive përgjegjësi të zgjeruara mbi zonat rurale, por këto hapësira nuk duhet të trajtohen vetëm për shërbime bazë, duke kërkuar më shumë angazhim në zhvillimin ekonomik dhe menaxhimin e tyre.

Rama nënvizoi se ky kriter duhet të merret parasysh nga të gjithë drejtuesit vendorë që synojnë një mandat të dytë, duke e konsideruar atë si një standard të ri për vlerësimin e performancës së tyre.