Lalëz, 21 Mars 2026

Kryeministri Edi Rama njoftoi ndryshime në rolin dhe funksionet e prefektëve të qarqeve, duke theksuar se ata do të kenë një rol më të zgjeruar në administrimin e territorit.

Gjatë fjalës së tij në Asamblenë e Partisë Socialiste, Rama deklaroi se prefektët do të funksionojnë si “12 zëvendësministra të brendshëm” në terren, duke mos u kufizuar më vetëm në kompetenca formale. Sipas tij, ky ndryshim synon forcimin e pranisë dhe kontrollit të qeverisë në nivel vendor.

Kryeministri paralajmëroi gjithashtu reforma në sistemin e emergjencave civile dhe shtimin e flotës së zjarrfikësve në vend. Ai u shpreh se do të investohet në rritjen e kapaciteteve të reagimit, ndërsa një pjesë e mjeteve të inspektimit dhe shërbimeve pritet të prodhohen në Shqipëri.

Në të njëjtën kohë, Rama theksoi se në disa zona të vendit, përfshirë Beratin, trendi i lëvizjes së popullsisë ka nisur të ndryshojë, me më shumë kthime sesa largime, duke e lidhur këtë me përmirësimin e kushteve dhe mundësive në vend.