Tiranë, 21 Mars 2026

Kryeministri Edi Rama njoftoi se në rast se çmimi i naftës arrin 220 lekë për litër, qeveria do të aplikojë një ulje prej 20% të akcizës, si masë për të lehtësuar barrën për qytetarët.

Deklarata e Ramës u komentua ashpër nga kreu i Partisë Demokratike, Sali Berisha, i cili e konsideroi si cinizëm dhe kritikoi qeverinë për përfitimet që pretendohet se rrjedhin nga rritja e çmimit të naftës. Në një bashkëbisedim online me qytetarët, Berisha u shpreh se shqiptarët duhet të reagojnë, duke nxjerrë automjetet dhe bllokuar rrugët për të shprehur pakënaqësinë ndaj politikave të çmimeve.

Berisha: ‘Cinizëm i ulët. Do të thotë që çmimi do të shkojë 220 lekë dhe ky është lubia që po përfiton më shumë nga çmimi i naftës.

Kur çmimi shkon 220 përfitimi i tij nga ky çmim rritet në 40 për qind dhe këtu zotohet se do të nxjerrë sytë e do të vërë vetullat, cinike dhe e turpshme.

Kjo është një motiv për çdo qytetarë të nxjerrim makinat të bllokojmë rrugët e të mos lëmë një kryehajdut të sillet në këtë mënyrë’.

Lajmi vjen pak ditë pas njoftimit të Ramës në Asamblenë e PS-së, ku ai paralajmëroi se rritja e çmimit të naftës mund të kompensohet me uljen e akcizës, për të mbrojtur konsumatorët.