Kryeministri Edi Rama deklaroi se Bashkimi Evropian mbetet një prioritet kyç për Shqipërinë, duke theksuar se negociatat e anëtarësimit po ecin pa ndërprerje dhe pritet të përmbyllen brenda mandatit aktual të qeverisë.

Gjatë fjalës së tij, Rama u shpreh se procesi i integrimit evropian nuk është thjesht teknik, por një çështje me rëndësi kombëtare, duke shtuar se, sipas tij, narrativa kundërshtuese e së kaluarës është përmbysur nga zhvillimet e fundit.

“Negociatat për BE nuk janë ndalur në asnjë moment. Vlerësimi i Komisioni Evropian për Shqipërinë është shumë pozitiv. Ne do t’i mbyllim negociatat brenda mandatit tonë,” u shpreh Rama.

Ai kritikoi kundërshtarët politikë, duke i akuzuar se më herët e kanë konsideruar të pamundur integrimin, ndërsa tani, sipas tij, po ndryshojnë qëndrimet për shkak të progresit të arritur.

Kryeministri theksoi gjithashtu se administrata shqiptare është e angazhuar intensivisht në këtë proces, me struktura të tëra që punojnë çdo ditë për përmbushjen e detyrimeve që rrjedhin nga negociatat.

Sipas Ramës, asnjë pengesë e jashtme nuk do të mund të ndalë avancimin e Shqipërisë drejt anëtarësimit në Bashkimin Evropian.