Irani lëshoi sot një paralajmërim se presidentin amerikan Donald Trump dhe kryeministrin izraelit Benjamin Netanyahu i pret fati i Sadam Husein.

"Fati i tiranit Sadam i pret Trumpin dhe kriminelin Netanyahu", thuhet në një deklaratë që dha tv shtetëror Press Tv, duke iu referuar ish-diktatorit irakian Sadam Husein.

Deklarata u bë nga Korpusi i Gardës së Revolucionit Islamik (IRGC) i cili tha se ka nisur valën e 67-të të Operacionit të saj "Premtimi i Vërtetë 4", duke synuar bazat ushtarake amerikane dhe infrastrukturën ushtarake izraelite në rajon.

IRGC shtoi se operacionet janë pjesë e strategjisë më të gjerë të rezistencës së Iranit, duke deklaruar: "Hyrja jonë në betejë nuk është një disfatë. Zoti na e ka mbyllur rrugën drejt disfatës dhe fitorja është afër."

Garda Revolucionare e Iranit deklaroi se goditi pozicione kyçe amerikane, përfshirë bazën Ali al-Salem, e cila strehon qendra komande për dronë dhe hapësirë ​​ajrore, objekte mirëmbajtjeje të avionëve dhe qendrën e operacioneve të koalicionit të udhëhequr nga SHBA-të.

Sulmi shënjestroi gjithashtu sistemet e radarëve të paralajmërimit të hershëm dhe instalimet e mbrojtjes nga raketat në bazën Al-Wafa. Përveç kësaj, forcat iraniane thonë se goditën qendrat izraelite të radarëve, satelitëve dhe mbrojtjes nga raketat në të gjithë territoret e pushtuara palestineze.