Finalizohet operacioni policor i koduar “Kurtaj”, i zhvilluar nga Drejtoria për Krimet në Volum pranë Drejtoria e Përgjithshme e Policisë së Shtetit, në bashkëpunim me DVP Elbasan dhe Komisariatin e Policisë Peqin, nën drejtimin e Prokurorisë Elbasan.

Gjatë kontrollit në fshatin Kurtaj, policia zbuloi dy ambiente të përshtatura për kultivimin e bimëve narkotike me llamba dhe neonë, ku ishin kultivuar rreth 4,000 bimë kanabis.

Nga hetimet rezultoi se ambienti është në pronësi të shtetasit Bilal Hasa, drejtor i burgut Rrogozhinë i cili është shpallur në kërkim. Po ashtu, për veprën penale “Shpërdorimi i detyrës”, në kërkim është shpallur edhe shtetasi Ervis Maçi, përgjegjës i OSHEE Peqin për zonën e Peqinit.

Operacioni vijon nën drejtimin e Prokurorisë Elbasan, ndërsa shërbimet e Policisë po punojnë intensivisht për kapjen e personave të shpallur në kërkim dhe identifikimin e çdo individi tjetër të përfshirë në këtë veprimtari kriminale.

Sekuestrimi përfshin llamba, neonë dhe pajisje të tjera elektrike, të cilat ishin përdorur për kultivimin e bimëve narkotike në ambientet e mbyllura. Njoftimi i Policisë:

Peqin/Finalizohet operacioni policor i koduar “Kurtaj” për goditjen e kultivimit të bimëve narkotike në ambiente të mbyllura me anë të llambave.

Operacioni u zhvillua nga Drejtoria për Krimet në Volum në Drejtorinë e Përgjithshme të Policisë së Shtetit, në bashkëpunim me DVP Elbasan dhe Komisariatin e Policisë Peqin, nën drejtimin e Prokurorisë Elbasan.

Zbulohen 2 ambiente të përshtatura për kultivimin e bimëve narkotike.

Sekuestrohen rreth 4000 bimë kanabisi, llamba, neonë dhe pajisje të tjera elektrike.

Shpallet në kërkim pronari i ambientit.

Në kërkim edhe përgjegjësi i OSHEE-së për Peqinin, për shpërdorim detyre.

Në vijim të planit të masave për evidentimin dhe goditjen e kultivimit të bimëve narkotike në ambiente të mbyllura, bazuar edhe në informacionet e siguruara në rrugë operative, shërbimet e Policisë në kuadër të operacionit policor të koduar "Kurtaj", ushtruan kontroll në fshatin Kurtaj, njësia administrative Gjocaj.

Gjatë kontrollit, në bodrumin e një magazine, u konstatuan 2 ambiente të përshtatura për kultivimin e bimëve narkotike me anë të llambave, ku ishin kultivuar rreth 4000 bimë kanabis.

Nga veprimet hetimore rezultoi se ambienti është në pronësi të shtetasit B. H., i cili u shpall në kërkim.

Në vijim të veprimeve, për veprën penale “Shpërdorimi i detyrës”, u shpall në kërkim edhe shtetasi E. M., me detyrë përgjegjës i OSHEE-së për zonën e Peqinit.

Shërbimet e Policisë vijojnë punën për kapjen e tyre.

Operacioni, nën drejtimin e Prokurorisë Elbasan, vijon, ndërsa po punohet intensivisht për identifikimin dhe nxjerrjen përpara përgjegjësisë penale të personave të tjerë të përfshirë në këtë veprimtari kriminale.