Gazetari dhe publicisti i njohur, Namir Lapardhaja, është ndarë nga jeta në moshën 40-vjeçare në Gjermani, në orët e para të mëngjesit.

Sipas të dhënave paraprake, dyshohet se shkaku i vdekjes ka qenë një trombozë në zemër.

Lajmi është konfirmuar nga familjarët e tij, të cilët kanë bërë me dije se ndryshe nga herët e tjera, ai nuk po përgjigjej në telefon ndaj thirrjeve të kolegëve dhe të afërmve, duke ngritur shqetësim.

Vetëm pak ditë më parë, më 5 mars, Lapardhaja kishte festuar ditëlindjen e tij.

I njohur për angazhimin qytetar, analizat dhe qëndrimet e tij publike, ai ishte një zë i spikatur në media si publicist dhe kritik letrar.

Namir Lapardhaja është autor i disa librave, eseve dhe një numri të madh artikujsh, të cilët përbëjnë një trashëgimi të rëndësishme kulturore dhe intelektuale për shoqërinë dhe për familjen e tij.

Në webin e tij ai ka publikuar shkrime ku më i fundit është ky që lexoni më poshtë:

Të krahasosh të pakrahasueshmen!

Nga Namir Lapardhaja

Edi Rama paska thënë se Gjermania është bërë e vështirë për vetë gjermanët dhe jo më për ne, duke nënkuptuar që mundësitë në Shqipëri janë më të mira se atje. (Të mendosh që gjithmonë paranojat e autokratëve janë ta krahasojnë veten me të pakrahasueshmen).

Po, Rama ka të drejtë kur thotë që Gjermania sot ka vështirësi të mëdha, por janë vështirësitë e një shteti prej 84 milionë banorësh që sfidën e ka me veten për të qenë numri një në Evropë për gjithçka dhe për t’u shndërruar në lokomotivën ekonomike të kontinentit.

Ndërkohë që vendi që drejton Edi Rama prej 12 vitesh, e vetmja gjë me të cilën mburret, është kafeja e mirë, madje edhe për këtë gjë nuk ka kurrfarë merite qeveria.

Ashtu sikurse nuk ka meritë për zhvillimin e turizmit apo për sektorë të ngjashëm, të cilët ecin falë projekteve individuale të njerëzve vizionarë, që përveçse vëshitrësive të panumërta, nuk marrin kurrfarë mbështeje nga qeveria e tij.

Përveçse korrupsion, nepotizëm, klientelizën, pasiguri, pabarazi, bukë dhe cirk, çfarë ofron tjetër Edi Rama?

Po vendi që ai drejton me kë e ka garën për t’u krahasuar? Se, me sa shohim, edhe Kosova dhe Maqedonia e kanë lënë prapa! Për të mos hedhur sytë pak më tej.